शनिवार , आश्विन २४, २०८३
काभ्रेपलाञ्चोक, २४ असोज- काभ्रेपलाञ्चोकको रोशी गाउँपालिका–९ स्थित पिन्थलीमा लेदोसहितको पहिरो खसेर अवरुद्ध भएको बीपी राजमार्ग पुनः सञ्चालनमा आएको छ। सडकमा थुप्रिएको पहिरो र लेदो हटाइएसँगै राजमार्गमा दुवैतर्फ सवारीसाधन आवागमन सुचारु भएको हो।
पिन्थलीमा सडकभन्दा माथिल्लो भागबाट लेदोसहितको पहिरो खसेपछि राजमार्ग रातिदेखि अवरुद्ध भएको थियो। पहिरोका कारण प्रभावित बनेको सडक खण्डमा थुप्रिएको लेदो तथा पहिरो पन्छाएपछि यातायात सञ्चालनका लागि मार्ग खुलेको हो।
राजमार्ग पुनः सञ्चालनमा आए पनि जिल्ला प्रशासन कार्यालय काभ्रेपलाञ्चोकले उक्त सडक हुँदै यात्रा गर्ने यात्रु तथा सवारी चालकलाई विशेष सतर्कता अपनाउन आग्रह गरेको छ। पहिरो प्रभावित क्षेत्रमा यात्रा गर्दा सडकको अवस्थाबारे पर्याप्त जानकारी लिनुपर्नेमा प्रशासनले जोड दिएको छ।
प्रशासनले सम्बन्धित निकाय, यात्रु तथा सवारी चालकलाई यात्रा सुरु गर्नुअघि स्थानीय प्रहरीसँग सम्पर्क गरी सडकको पछिल्लो अवस्थाबारे जानकारी लिन अनुरोध गरेको छ। सडकको अवस्था बुझ्न प्रहरी सञ्चारको १०० नम्बर वा जिल्ला आपत्कालीन सञ्चालन केन्द्रको १२३४ नम्बरमा सम्पर्क गर्न सकिने जनाइएको छ।
पहिरो हटाएर बीपी राजमार्गमा दुईतर्फी यातायात सञ्चालनमा ल्याइए पनि सम्भावित जोखिमप्रति सचेत रहँदै आधिकारिक निकायबाट सडकको अवस्था यकिन गरेर मात्र यात्रा गर्न प्रशासनले आग्रह गरेको छ।
© 2026 All right reserved to sindhulisaugat.com
Design & Developed By
