बुधवार , भाद्र २४, २०८३
सिन्धुली — मदन भण्डारी राजमार्गअन्तर्गत सिन्धुलीको हरिहरपुरगढी गाउँपालिका–३ घण्टे क्षेत्रमा भएको सवारी दुर्घटनामा एक पैदलयात्रीको घटनास्थलमै मृत्यु भएको छ भने दुई जना मोटरसाइकल सवार घाइते भएको बागमति प्रहदश प्रहरी कार्यालय हेटौडाले बुधवार जानकारी दिएको छ ।
प्रहरीका अनुसार मंगलवार साँझ ७ः३० बजे सिन्धुलीतर्फबाट मकवानपुर जाँदै गरेको बा.प्र.०३–००१ ख १८१४ नम्बरको खाली मिनी ट्रकले पैदल हिँडिरहेका हरिहरपुरगढी गाउँपालिका–३ घण्टे निवासी करिब ४५÷५० वर्षीय माइते राईलाई ठक्कर दिएको थियो। दुर्घटनाबाट गम्भीर घाइते भएका राईको घटनास्थलमै मृत्यु भएको प्रहरीले जनाएको छ । मृतकको शव प्रारम्भिक कानुनी प्रक्रिया पूरा नहुँदासम्म घटनास्थलमै राखिएको थियो ।
सोही क्रममा सडकको छेउमा रोकि राखिएको उक्त ट्रकमा मधेश प्रदेश ०२–०१० प ००३४ नम्बरको मोटरसाइकल ठोक्किन पुगेको प्रहरीले जनाएको छ । मोटरसाइकल कमलामाई नगरपालिका–६ सिन्धुली निवासी २३ वर्षीय सुरेश कुमार साहले चलाएका थिए । दुर्घटनामा साहको गाला र अनुहारमा भित्री चोट लागेको छ भने अवस्था सामान्य रहेको छ ।
मोटरसाइकलको पछाडि सवार सोही स्थानका २९ वर्षीय सुशान्त साह घाइते भएका छन् । उनको दाहिने हात, नाक र मुखमा चोट लागेको प्रहरीले जानकारी दिएको छ । दुवै घाइतेलाई थप उपचारका लागि मकवानपुरको झुरझुरेस्थित साजी मेडिकलतर्फ पठाइएको छ ।
थप विवरणअनुसार राति ११ः४० बजे कानुनी प्रक्रिया पूरा गरी मृतक राईको शव पोस्टमार्टमका लागि कपिलाकोट स्वास्थ्य चौकीमा पठाइएको छ । दुर्घटनामा संलग्न मिनी ट्रक र चालकलाई इलाका प्रहरी कार्यालय कपिलाकोटले नियन्त्रणमा लिएर आवश्यक अनुसन्धान तथा कानुनी प्रक्रिया अघि बढाएको जनाएको छ ।
© 2026 All right reserved to sindhulisaugat.com
Design & Developed By
