बिहिवार , भाद्र १८, २०८३
सिन्धुली ,१८ भदौ – चीनतर्फबाट भोटेकोशी हुँदै त्रिशूली नदीमा आएको भीषण बाढीबाट प्रभावित तथा क्षतिग्रस्त क्षेत्रका पीडितलाई राहत उपलब्ध गराउने उद्देश्यले सिन्धुली निर्माण व्यवसायी संघमा आबद्ध सदस्यहरूले आर्थिक सहयोग गरेका छन् ।
संघमा आबद्ध सदस्यहरूबाट संकलित एक लाख ५१ हजार रुपैयाँ प्रधानमन्त्री राहत कोषमा जम्मा गरिएको हो । संकलित रकम संघका प्रतिनिधिहरूले सिन्धुलीका प्रमुख जिल्ला अधिकारीमार्फत प्रधानमन्त्री राहत कोषमा हस्तान्तरण गरेका छन् ।
चीनतर्फबाट आएको बाढी भोटेकोशी नदी हुँदै त्रिशूलीमा मिसिएपछि नदी आसपासका क्षेत्रमा ठूलो क्षति पुगेको थियो । बाढीका कारण जनजीवन प्रभावित हुनुका साथै भौतिक संरचना, सडक, पुल, बस्ती तथा अन्य सार्वजनिक सम्पत्तिमा क्षति पुगेको जनाइएको छ । विपद्बाट प्रभावित नागरिकलाई राहत तथा पुनःस्थापनामा सहयोग पु¥याउने लक्ष्यसहित संघका सदस्यहरूले स्वेच्छिक रूपमा रकम संकलन गरेका हुन् ।
प्रधानमन्त्री राहत कोषमा जम्मा गरिएको रकम बाढीबाट प्रभावित नागरिकको राहत, उद्धार तथा पुनःस्थापना कार्यमा उपयोग हुने अपेक्षा गरिएको छ । विपद्को समयमा निजी क्षेत्र, व्यवसायी तथा सामाजिक संघसंस्थाबाट प्राप्त सहयोगले राज्यको राहत व्यवस्थापनमा थप सहजीकरण हुने सम्बद्ध पक्षको विश्वास छ ।
निर्माण व्यवसायसँग प्रत्यक्ष रूपमा जोडिएका व्यवसायीहरूले पूर्वाधारमा भएको क्षति र त्यसबाट सिर्जित समस्यालाई नजिकबाट अनुभूति गर्दै राहत कोषमा सहयोग गरेका हुन् । संघले विपदमा परेका नागरिकप्रति ऐक्यबद्धता जनाउँदै आफ्नो सामाजिक उत्तरदायित्वअन्तर्गत सहयोग रकम उपलब्ध गराएको जनाएको छ ।
प्रमुख जिल्ला अधिकारीमार्फत रकम हस्तान्तरण गरिएपछि उक्त सहयोग औपचारिक रूपमा प्रधानमन्त्री राहत कोषमा पठाइएको हो । कोषमा जम्मा हुने रकम सरकारको समन्वयमा प्रभावित क्षेत्रका नागरिकलाई आवश्यकताअनुसार राहत वितरण तथा पुनःनिर्माणसम्बन्धी कार्यमा परिचालन गरिनेछ ।
बाढीका कारण उत्पन्न संकटका बेला स्थानीय व्यवसायी समुदायबाट भएको आर्थिक सहयोगले मानवीय सहकार्य र सामाजिक उत्तरदायित्वको उदाहरण प्रस्तुत गरेको छ । राहत कोषमा संकलित रकमले प्रभावित परिवारको तत्कालीन आवश्यकता सम्बोधन गर्न तथा क्षतिग्रस्त संरचनाको पुनःस्थापना प्रक्रियामा योगदान पु¥याउने विश्वास गरिएको छ ।
© 2026 All right reserved to sindhulisaugat.com
Design & Developed By
