मंगलवार , भाद्र १६, २०८३
सिन्धुली,१६ भदौ – सिन्धुलीस्थित भगवती अंग्रेजी माध्यमिक विद्यालयका विद्यार्थीहरूले मानवीय संवेदना र सामाजिक उत्तरदायित्वको उदाहरण प्रस्तुत गर्दै बाढीपीडित बालबालिकाको शैक्षिक उत्थानका लागि एक लाख ३२ हजार सात सय रुपैयाँ सहयोग गरेका छन् ।
विद्यार्थीहरूले आफ्नो खाजा खर्च तथा दैनिक व्यक्तिगत प्रयोजनका लागि छुट्याइएको रकम बचत गरी उक्त सहयोग संकलन गरेका हुन् । भोटेकोशीमा आएको बाढी तथा पहिरोबाट प्रभावित बालबालिकाको पठनपाठनलाई निरन्तरता दिन सहयोग पुग्ने उद्देश्यले विद्यालयका विद्यार्थीले स्वस्फूर्त रूपमा रकम संकलन गरेको
बाढीका कारण प्रभावित परिवारका बालबालिकाको नियमित अध्ययनमा पर्न सक्ने असरलाई ध्यानमा राख्दै विद्यार्थीहरू सहयोग अभियानमा सहभागी भएका हुन् । सानो उमेरमै विपद्बाट प्रभावित समुदायप्रति सहानुभूति व्यक्त गर्दै उनीहरूले व्यक्तिगत खर्च कटौती गरेर शैक्षिक सहयोगका लागि रकम जुटाएका छन् ।
संकलित एक लाख ३२ हजार सात सय रुपैयाँ जिल्ला प्रशासन कार्यालय सिन्धुलीमार्फत प्रधानमन्त्री दैवी प्रकोप राहत कोषमा जम्मा गरिएको छ । उक्त रकम रसुवा तथा भोटेकोशी क्षेत्रका बाढीप्रभावित बालबालिकाको शैक्षिक आवश्यकतामा सहयोग पुग्ने अपेक्षा गरिएको छ ।
विद्यालय उमेरका बालबालिकाले आफ्नै आवश्यकता र रहरका लागि खर्च हुन सक्ने रकम बचत गरी विपद्पीडित बालबालिकाको शिक्षाका लागि सहयोग गर्नु सामाजिक उत्तरदायित्वको उल्लेखनीय उदाहरणका रूपमा हेरिएको छ । यस अभियानले विपद्को प्रभाव भौगोलिक सीमाभित्र मात्र सीमित नरहने र मानवीय सहयोगको भावना सबै ठाउँबाट जुट्न सक्ने सन्देश दिएको छ ।
विद्यार्थीहरूको यस पहलको विभिन्न क्षेत्रबाट प्रशंसा भइरहेको छ । सानै उमेरमा सामाजिक सरोकार, सहकार्य र परोपकारको भावना देखाउँदै गरिएको सहयोगले अन्य विद्यार्थी, विद्यालय तथा समुदायलाई पनि विपद्पीडितको सहयोगमा अग्रसर हुन प्रेरित गर्ने अपेक्षा गरिएको छ ।
© 2026 All right reserved to sindhulisaugat.com
Design & Developed By
