बिहिवार , भाद्र ४, २०८३
काठमाडौं,०४ भदौं – लागुऔषध नियन्त्रण ब्यूरो कोटेश्वरबाट खटिएको प्रहरी टोलीले काठमाडौँ उपत्यकामा लागुऔषध कारोबारमा संलग्न रहेको आशंकामा दुई जनालाई लागुऔषध हेरोइनसहित पक्राउ गरेको छ । ब्यूरोका अनुसार जिल्ला काठमाडौँ कागेश्वरी मनोहरा नगरपालिका–६ स्थित क्षेत्रमा लागुऔषध खरिद–बिक्री भइरहेको सूचनाका आधारमा गरिएको निगरानी तथा अनुसन्धानका क्रममा उनीहरू पक्राउ परेका हुन् ।
प्रहरीका अनुसार मंगलवार ब्यूरो कोटेश्वरबाट परिचालित टोलीले कागेश्वरी मनोहरा नगरपालिका–६ बाट लागुऔषध कारोबार गरिरहेको अवस्थामा दुई जनालाई नियन्त्रणमा लिएको हो । पक्राउ पर्नेमा जिल्ला दोलखा शैलुङ गाउँपालिका–८ स्थायी ठेगाना भएका २५ वर्षीय सुमिन कार्की र जिल्ला सप्तरी शम्भुनाथ नगरपालिका–७ ठेगाना भएका ४२ वर्षीय अजय दास रहेका छन् ।
उनीहरूको साथबाट लागुऔषध खैरो हेरोइन ३२.५८० ग्राम, नेपाली नगद चार लाख रुपैयाँ, डिजिटल तराजु थान–२ तथा मोबाइल फोन थान–२ बरामद गरिएको प्रहरीले जनाएको छ । बरामद सामग्रीसहित पक्राउ परेका दुवै जनामाथि थप अनुसन्धान भइरहेको लागुऔषध नियन्त्रण ब्यूरोले जानकारी दिएको छ ।
लागुऔषधको अवैध कारोबार नियन्त्रण गर्ने उद्देश्यले ब्यूरोले निरन्तर निगरानी, सूचना संकलन र कारबाही अभियान सञ्चालन गर्दै आएको छ । पछिल्लो घटनाले राजधानी क्षेत्रमा लागुऔषध कारोबार नियन्त्रणका लागि सुरक्षा निकायले सक्रियता बढाइरहेको देखाएको छ ।
लागुऔषध नियन्त्रण ब्यूरो कोटेश्वरका अनुसार पक्राउ परेका व्यक्तिहरूको संलग्नता, कारोबारको सञ्जाल तथा अन्य सम्भावित व्यक्तिहरूबारे अनुसन्धान अघि बढाइएको छ । अनुसन्धानबाट प्राप्त तथ्यका आधारमा थप कानुनी प्रक्रिया अगाडि बढाइने प्रहरीले जनाएको छ ।
© 2026 All right reserved to sindhulisaugat.com
Design & Developed By
