काठमाडौं, २१ साउन — ललितपुरको ग्वार्कोमा बिहीबार बिहान भएको बस दुर्घटनामा एक महिलाको मृत्यु भएको छ भने सिन्धुलीका दुई जनासहित १८ जना घाइते भएका छन् । कोटेश्वरबाट ग्वार्कोतर्फ जाँदै गरेको बा २ ख ३५९० नम्बरको बस ग्वार्को फ्लाईओभरमा ठोक्किएर दुर्घटना भएको जिल्ला प्रहरी परिसर ललितपुरले जनाएको छ ।

जिल्ला प्रहरी परिसर ललितपुरका प्रहरी उपरीक्षक (एसपी) गौतम मिश्रका अनुसार दुर्घटनामा दोलखाको सैलुङ गाउँपालिका घर भई हाल भक्तपुरको सूर्यविनायक बस्दै आएकी ४० वर्षीया जेनिशा लामाको मृत्यु भएको हो। बिहीबार बिहान करिब साढे १० बजेतिर भएको दुर्घटनापछि घाइते सबैलाई उपचारका लागि विभिन्न अस्पताल पठाइएको प्रहरीले जनाएको छ ।

एसपी मिश्रका अनुसार दुर्घटनामा १९ जना घाइते भए पनि उपचारका क्रममा विवरण अद्यावधिक हुँदा घाइतेको संख्या १८ रहेको जनाइएको छ । घाइतेमध्ये केहीको अवस्था सामान्य रहेको र केहीको अवस्था गम्भीर रहेको प्रहरीले जनाएको छ । दुर्घटनापछि प्रहरीले बस चालक काभ्रेको तिमाल गाउँपालिका–३ घर भई हाल भक्तपुर बस्दै आएका ३६ वर्षीय लक्षी तामाङलाई नियन्त्रणमा लिएको छ ।

दुर्घटनामा घाइते भएकामध्ये बी एण्ड बी अस्पतालमा उपचाररत नौ जनाको विवरण सार्वजनिक गरिएको छ । उनीहरूमध्ये रामेछाप घर भई भक्तपुर सूर्यविनायक बस्ने २३ वर्षीया सुन्निमा योन्जनको अवस्था गम्भीर रहेको छ । उनको शरीरको भित्री भागमा चोट लागेको छ । कञ्चनपुर घर भई भक्तपुर बस्ने २४ वर्षीय तुल्सी धानुक सामान्य घाइते भएका छन् भने भक्तपुरकी ४० वर्षीया कविता कार्कीको टाउकोमा चोट लागेको छ ।

त्यस्तै, सिन्धुलीको मरिण गाउँपालिका–३ घर भई हाल भक्तपुर बस्ने ३३ वर्षीय धनकुमार ढोङको बायाँ खुट्टामा सामान्य चोट लागेको छ । भक्तपुर ठिमी नगरपालिका–६ की ३७ वर्षीया लक्ष्मी श्रेष्ठको बायाँ हात र कम्मरमा चोट लागेको छ । चाँगुनारायण नगरपालिका–७ सरस्वतीखेलकी २४ वर्षीया रशिला दुलाल सामान्य कम्मरको चोटसहित उपचाररत छिन् । भक्तपुर सरस्वतीखेल–६ का ६० वर्षीय कृष्णराम थापा, जो बसका सहचालक हुन्, उनको बायाँ खुट्टा भाँचिएको र अवस्था गम्भीर रहेको छ । काभ्रेको बनेपा–१४ घर भई हाल भक्तपुर सरस्वतीखेल बस्ने ४१ वर्षीया अमृता कार्कीको दायाँ हातको पाखुरा र कम्मरमा सामान्य चोट लागेको छ भने ललितपुर महालक्ष्मी नगरपालिका–५ की ४० वर्षीया कविता केसीको टाउकोमा सामान्य चोट लागेको छ ।

ग्लोबल अस्पतालमा उपचाररत घाइतेहरूमा दोलखा घर भई भक्तपुर सूर्यविनायक बस्ने २४ वर्षीय विवेक दाहाल, सिन्धुली घर भई सूर्यविनायक बस्ने १९ वर्षीया भगवती खत्री, भक्तपुर मिलनचोककी ४७ वर्षीया भगवती खत्री, भक्तपुरकी २८ वर्षीया जुनु शिल्पकार, ललितपुर महालक्ष्मीस्थानकी ४९ वर्षीया तुल्सीदेवी खड्का रहेका छन् ।

यसैगरी महोत्तरी घर भई हाल भक्तपुर गठ्ठाघर बस्ने २१ वर्षीया अन्जु साह, काठमाडौं ठमेल घर भई सूर्यविनायक बस्ने २७ वर्षीय आशुतोष श्रेष्ठ, सिन्धुपाल्चोक घर भई हाल ललितपुर भैंसेपाटी बस्ने ३६ वर्षीया स्तर देउजा र भारत घर भई हाल भक्तपुर कौशलटार बस्ने ४५ वर्षीय मोहम्मद समिम पनि ग्लोबल अस्पतालमा उपचाररत रहेको प्रहरीले जनाएको छ ।

प्रहरीले दुर्घटनाको कारणबारे थप अनुसन्धान भइरहेको जनाएको छ । प्रारम्भिक विवरणअनुसार बस फ्लाईओभरमा ठोक्किएपछि दुर्घटना भएको देखिएको छ । प्रहरीले चालकको लापरवाही, सवारीको अवस्था तथा अन्य प्राविधिक पक्षबारे अनुसन्धान अघि बढाएको जनाएको छ ।