सिन्धुली,– आसन्न स्थानीय तह निर्बाचनका लागि उम्मेदवारको मनोनयन दर्ता गर्ने पहिलो दिन सिन्धुली जिल्लामा आईतबार विभिन्न पालिकामा विभिन्न पदको दाबी गर्दै स्वतन्त्र सहित ६८ जनाको उम्मेदवारी दर्ता भएको छ ।

दुधौली नगरपालिकाको मेयरमा र सुनकोशी गाँउपालिका अध्यक्षमा नेपाली काँग्रेसका बागी उम्मेदवार उठेका छन् । दुधौली नगरपालिकाको मेयरमा स्वतन्त्र उम्मेदवारको रुपमा सिन्धुलीका पूर्व जिल्ला शिक्षा अधिकारी केदारप्रसाद गिरी र सुनकोशी गाँउपालिका नेपाली काँग्रेसका वडा नं. ७ का सभापति उत्तरकुमार लामाले अध्यक्षमा स्वतन्त्र उम्मेदवारको रुपमा उम्मेदवारी दर्ता गर्नु भएको छ । सत्तारुढ गठबन्धन र नेकपा एमालेले उम्मेदवार चयनमा अलमल भएको भन्दै सोमबार मात्रै निर्बाचन अधिकृतको कार्यालयमा उम्मेदवारी दर्ता गर्ने जनाएका छन् ।

नाँै वटा स्थानीय तह रहेको सिन्धुली जिल्लामा पालिका अध्यक्ष तथा मेयरमा १३ जना, उपाध्यक्षमा तीन जना र अन्य पदमा ५२ जनाको उम्मेदवारी दर्ता भएको निर्बाचन अधिकृतको कार्यालयले जनाएको छ ।

मरिण गाँउपालिकामा अध्यक्षको दाबी गर्दै नेकपा (एमाले)बाट गोबिन्दलाल माझीले उम्मेदवारी दर्ता गर्नु भएको छ । त्यस्तै, मंगोल नेश्नल अर्गनाईजेसनबाट छलिमाया पाख्रिन र उपाध्यक्षमा धनजरीमाया बल र स्वतन्त्र रुपमा राजन थापाले उम्मेदवारी दर्ता गर्नु भएको छ । मरिण गाँउपालिकामा अन्य पदमा समेत गरेर छ जनाको उम्मेदवारी दर्ता भएको निर्बाचन अधिकृतको कार्यालयले जनाएको छ ।

हरिहरपुरगढी गाँउपालिकामा अध्यक्षको दाबी गर्दै नेकपा (एमाले)बाट मानबहादुर वाईवा र उपाध्यक्षमा निर्मला ठाडामगरले उम्मेदवारी दर्ता गर्नु भएको छ । गाँउपालिका अध्यक्ष पदको दाबी गर्दै मंगोल नेश्नल अर्गनाईजेशनबाट तुलसी राई, जनता समाजबादी नेपालबाट पञ्चमान बम्जनले उम्मेदवारी दर्ता गर्नु भएको छ । हरिहरपुरगढी गाँउपालिकामा अन्य पदमा समेत गरी ४० जनाको उम्मेदवारी दर्ता भएको निर्बाचन अकिृत भरतकुमार दाहालले जानकारी दिनुभयो ।

दुधौली नगरपालिकाको मेयरको दाबी गर्दै स्वतन्त्र उम्मेदवारको रुपमा केदारप्रसाद गिरी र भक्तिबिलास दाहालले उम्मेदवारी दर्ता गर्नु भएको छ । दुधौलीमा दुई जनाको उम्मेदवारी दर्ता भएको निर्बाचन अधिकृत दिपक ढकालले जानकारी दिनुभयो ।

तीनपाटन गाँउपालिकाको अध्यक्षको दाबी गर्दै नेकपा माक्र्सवादी (पुष्पलाल)बाट पुरुषोत्तम अधिकारीले उम्मेदवारी दर्ता गराउनु भएको छ । अर्का एक जनाले वडा अध्यक्षमा उम्मेदवारी दर्ता गर्नु भएको छ ।

गोलन्जोर गाँउपालिकामा अध्यक्ष पदको दाबी गर्दै नेकपा (समाजबादी)बाट हरिबाबु नेपालीले उम्मेदवारी दर्ता गर्नु भएको छ । सुनकोशी गाँउपालिकामा अध्यक्ष पदमा स्वतन्त्र उम्मेदवार उत्तरकुमार लामा, उन्नत लोकतन्त्र पार्टीबाट बालकुमार बुर्जा, नेपाली काँग्रेस बीपीबाट माधबप्रसाद न्यौपानेले उम्मेदवारी दर्ता गर्नु भएको निर्बाचन अधिकृतको कार्यालयले जनाएको छ । सुनकोशी गाँउपालिकामा अन्य पदमा समेत गरी आठ जनाको उम्मेदवारी दर्ता भएको छ ।

फिक्कल गाँउपालिकामा अध्यक्ष पदमा मंगोल नेश्नल अर्गनाईजेशन पार्टीबाट बुद्धबहादुर सुनुवारको उम्मेदवारी दर्ता भएको छ । फिक्कलमा अन्य पदमा समेत छ जनाको उम्मेदवारी दर्ता भएको छ । कमलमाई नगरपालिकामा वडा नं. ८ मा स्वतन्त्र वडा अध्यक्ष एक जना र घ्याङलेख गाँउपालिकामा वडा अध्यक्ष र सदस्य समेत गरी दुई जनाको उम्मेदवारी दर्ता भएको निर्बाचन अधिकृतको कार्यालयले जनाएको छ ।