आइतवार , भाद्र १३, २०७८
सिन्धुली – मरिण गाउपालिका अध्यक्ष पानीराज बम्जनले नेपाल विद्युत प्राधिकरणका कार्यकारी निर्देशक कुलमान घिसिङ संग आइतवार भेटगरी पालिकाको विभिन्न क्षेत्रमा विद्युत विस्तारमा सहयोग माग गर्नुभएको छ ।
गाउँपालिका क्षेत्र भित्र विद्युतको पहुँच नपुगेको वडा नं. १ र २ का सबै बस्तिहरु, वडा नं.–५ को अम्बास, वडा नं. ६ को बसेरी, लहरे, तेलनी, बाँझडाडा, भालुवाटार आदी बस्तिहरुमा विद्युत विस्तार गर्न आवश्यक सहयोग माग गरिएको अध्यक्ष बम्जनले जानकारी दिनुभयो ।
विगतमा पोलिङ गरेको काठका पोलहरुलाई विस्तापित गरी फलामका पोल व्यवस्थापन गर्न, मरिण गाउँपालिकामा निर्माण भएको ३३ केभी क्षमताको विद्युुतको सव–स्टेशनको छिटो संचालन गर्न पनि आग्रह गरिएको उहाँले बताउनुभयो ।
भेटका क्रममा सिन्धुली जिल्लाकै गौरवको आयोजना भित्र पर्ने कोखाजोर हाइड्रोपावर निर्माणका बिषयमा पनि छलफल भएको बताईएको छ ।
मरिण गाउँपालिका र दुधौली नगरपालिकामा विद्युतको महसुल काउण्टर स्थापना गर्न र सुनकोशी गाउँपालिकाको वडा नं. २ र ३ भरी विद्युत विस्तार लगायत सिन्धुली जिल्ला भरी विद्युत विस्तारको विषयमा भेटगाटका क्रममा छलफल भएको उहाँले बताउनुभयो ।
© 2026 All right reserved to sindhulisaugat.com
Design & Developed By
