सिन्धुली,०५ साउन — जिल्ला प्रहरी कार्यालय सिन्धुलीले बीपी राजमार्गमा सञ्चालन हुने विभिन्न सवारीसाधन जाँच गर्ने क्रममा बिलबिजक तथा आवश्यक कागजात नभएका दुई लाख ८५ हजार ९० रुपैयाँ बराबरका विभिन्न सामान नियन्त्रणमा लिएको छ । नियन्त्रणमा लिइएका सामान आवश्यक अनुसन्धान तथा कारबाहीका लागि जनकपुर भन्सार कार्यालय पठाइएको जिल्ला प्रहरी कार्यालय सिन्धुलीले जनाएको छ ।

जिल्ला प्रहरी कार्यालय सिन्धुलीबाट खटिएको प्रहरी जाँच टोलीले कमलामाई नगरपालिका–६ अन्तर्गत पर्ने बीपी राजमार्गमा विभिन्न सवारीसाधन रोकेर जाँच गरेको थियो । जाँचका क्रममा सम्बन्धित सामान खरिद, बिक्री वा ढुवानी गरिएको पुष्टि गर्ने बिल, भरपाई तथा भन्सारसम्बन्धी कागजात फेला नपरेपछि प्रहरीले सामान नियन्त्रणमा लिएको हो ।

प्रहरीका अनुसार नियन्त्रणमा लिइएका सामान विभिन्न सवारीसाधनमा राखेर ओसारपसार गरिँदै थिए । बिलबिजक तथा वैधानिक कागजात नभएकाले ती सामान भन्सार छली गरी चोरी निकासी वा पैठारी गरिएको हुन सक्ने आशंकामा नियन्त्रणमा लिइएको जिल्ला प्रहरी कार्यालय सिन्धुलीले जनाएको छ ।

प्रहरीले नियन्त्रणमा लिएका सामानमा विभिन्न विद्युतीय उपकरण, मोबाइलका सामग्री, खाद्यवस्तु, सुर्तीजन्य पदार्थ र सौन्दर्य प्रसाधन रहेका छन् । बरामद सामानमध्ये प्रतिपिस एक हजार रुपैयाँका दरले मूल्य निर्धारण गरिएका ४१ पिस एयरपड्स प्रो अनुमानित मूल्य ४१ हजार रुपैयाँ रहेको छ । त्यसैगरी, प्रतिपिस दुई हजार सात सय ५० रुपैयाँका दरले आठ पिस एयर डोप्स १७१ एक्स बोटको मूल्य २२ हजार रुपैयाँ कायम गरिएको छ ।

प्रतिपिस एक हजार रुपैयाँका दरले सात पिस स्योमी ब्लुटुथको सात हजार रुपैयाँ र प्रतिपिस एक हजार सात सय रुपैयाँका दरले ३० पिस मोबाइल डिस्प्लेको ५१ हजार रुपैयाँ मूल्यांकन गरिएको प्रहरीले जनाएको छ । त्यस्तै, दुई हजार ८० रुपैयाँ प्रतिप्याकेटका दरले ३२ प्याकेट रजनीगन्धाको कुल मूल्य ६६ हजार पाँच सय ६० रुपैयाँ कायम गरिएको छ ।

सौन्दर्य प्रसाधनतर्फ प्रतिपिस छ सय ५० रुपैयाँका दरले ४९ पिस मामा अर्थ राइस ब्राइट सनस्क्रिनको मूल्य ३१ हजार आठ सय ५० रुपैयाँ निर्धारण गरिएको छ । प्रतिपिस चार सय रुपैयाँका दरले ८२ पिस मामा अर्थ राइस ब्राइट फेसवासको मूल्य ३२ हजार आठ सय रुपैयाँ रहेको छ । त्यसैगरी, प्रतिपिस छ सय ४० रुपैयाँका दरले १० पिस मामा अर्थ टोनरको मूल्य छ हजार चार सय रुपैयाँ कायम गरिएको छ ।

खाद्य सामग्रीतर्फ प्रतिबट्टा तीन सय २० रुपैयाँका दरले १४ बट्टा कोपिको चकलेटको मूल्य चार हजार चार सय ८० रुपैयाँ रहेको छ । प्रतिकिलोग्राम एक हजार छ सय रुपैयाँका दरले २० किलोग्राम काजुको मूल्य ३२ हजार रुपैयाँ निर्धारण गरिएको प्रहरीले जनाएको छ । बरामद गरिएका सबै सामानको कुल अनुमानित मूल्य दुई लाख ८५  हजार ९० रुपैयाँ रहेको छ ।

जिल्ला प्रहरी कार्यालय सिन्धुलीले मंगलवार नेपाल  प्रेस नोट जारी गर्दै बरामद सामान आवश्यक कारबाहीका लागि जनकपुर भन्सार कार्यालय पठाइएको जानकारी दिएको हो । कार्यालयका सूचना अधिकारी तथा प्रहरी नायव उपरीक्षक विजय श्रेष्ठले घटनासम्बन्धी आधिकारिक जानकारी सार्वजनिक गरेका हुन् ।