सिन्धुली,२९ असार — लगातारको अविरल वर्षापछि आएको पहिरोले सिन्धुली जिल्लाको गोलन्जोर गाउँपालिका–४ तीनकन्या बेखटाँडीमा एक घर पूर्ण रूपमा पुरिएको छ । घटनामा घरभित्र फसेका स्थानीय हेमबहादुर मगरलाई करिब पाँच घण्टासम्म सञ्चालन गरिएको निरन्तर उद्धार अभियानपछि जीवित अवस्थामा बाहिर निकालिएको प्रहरीले जनाएको छ । पहिरोमा परेर घाइते भएका मगरको जिल्ला अस्पताल सिन्धुलीमा उपचार भइरहेको छ ।

प्रहरीका अनुसार आइतबार राति गएको पहिरोले हेमबहादुर मगरको घर पूर्ण रूपमा पुरेको थियो । पहिरो खस्ने बेला उनी घरभित्रै रहेकाले माटो र घरका भग्नावशेषमा च्यापिएर फसेका थिए। घटनाबारे जानकारी प्राप्त हुनासाथ नेपाल प्रहरी, सशस्त्र प्रहरी बल, स्थानीय जनप्रतिनिधि तथा स्थानीयवासी सम्मिलित संयुक्त उद्धार टोली घटनास्थल पुगेको थियो ।

संयुक्त टोलीले प्रतिकूल अवस्था र जोखिमका बीच निरन्तर उद्धार अभियान सञ्चालन गरेको थियो । करिब पाँच घण्टाको कठिन प्रयासपछि मगरलाई जीवित अवस्थामा बाहिर निकाल्न सफल भएको जिल्ला प्रहरी कार्यालय सिन्धुलीले जनाएको छ । उद्धारपछि उनलाई तत्काल उपचारका लागि जिल्ला अस्पताल सिन्धुली पु¥याइएको प्रहरीको भनाइ छ । अस्पतालमा उनको उपचार जारी रहेको र स्वास्थ्य अवस्थाबारे चिकित्सकीय निगरानी भइरहेको जनाइएको छ ।

घटनापछि उक्त क्षेत्रमा पहिरोको जोखिम अझै कायम रहेको स्थानीय जनप्रतिनिधिले बताएका छन् । वडा अध्यक्ष भक्त भुजेलका अनुसार पहिरो प्रभावित स्थान नजिकै रहेको अर्को घरसमेत उच्च जोखिममा रहेकाले स्थानीयवासीलाई सतर्क रहन आग्रह गरिएको छ । सम्भावित थप जोखिमलाई मध्यनजर गर्दै आवश्यक सावधानी अपनाउन पनि उनले अनुरोध गरेका छन् ।

यता, जिल्लामा निरन्तर वर्षा भइरहेकाले पहिरोको जोखिम उल्लेखनीय रूपमा बढेको भन्दै जिल्ला प्रशासन कार्यालय सिन्धुलीले सर्वसाधारणलाई उच्च सतर्कता अपनाउन अपिल गरेको छ । प्रशासनले विशेषगरी पहाडी तथा भिरालो भूभागमा बसोबास गर्ने नागरिकलाई मौसमको अवस्थाबारे निरन्तर जानकारी लिँदै सम्भावित विपद्प्रति सचेत रहन आग्रह गरेको छ ।

प्रशासनले वर्षायाममा पहिरो, भूक्षय तथा अन्य प्राकृतिक विपद्को सम्भावना बढ्ने भएकाले जोखिमयुक्त क्षेत्रमा अनावश्यक आवतजावत नगर्न, सुरक्षित स्थानमा बसोबास गर्न तथा कुनै पनि आपत्कालीन अवस्था सिर्जना भएमा तत्काल सम्बन्धित सुरक्षा निकायलाई जानकारी गराउन पनि अनुरोध गरेको छ ।

लगातारको वर्षासँगै पहाडी जिल्लामा पहिरोको जोखिम बढ्दै गएकाले स्थानीय प्रशासन तथा सुरक्षा निकायले सम्भावित विपद्को सामना गर्न आवश्यक तयारी र निगरानीलाई थप सुदृढ बनाएका छन् । यस्ता परिस्थितिमा स्थानीयवासीले सम्बन्धित निकायबाट जारी गरिएका सूचना र निर्देशनको पूर्ण पालना गर्दै आवश्यक सावधानी अपनाउनुपर्नेमा सरोकारवाला निकायले जोड दिएका छन् ।