आइतवार , भाद्र १४, २०८३
काठमाडौं, १४ भदौ – नेपाल–चीन सीमाक्षेत्रमा पहिरोका कारण बनेको बाँध तालको क्षेत्रफल करिब एक लाख वर्गमिटर पुगेको चिनियाँ सरकारी टेलिभिजन सीजीटीएनले जनाएको छ । उक्त क्षेत्रफल अन्तर्राष्ट्रिय मापदण्डअनुसारका करिब १४ वटा फुटबल मैदान बराबर रहेको बताइएको छ ।
सीजीटीएनले एन्नेङ ग्रुपले अगस्ट २९ सम्म गरेको स्थलगत अनुगमन तथा अध्ययनलाई उद्धृत गर्दै तालको फैलावटसम्बन्धी जानकारी सार्वजनिक गरेको हो। पहिरोले नदी वा खोलाको बहाव थुनिएपछि उक्त स्थानमा पानी जमेर ताल बनेको जनाइएको छ ।
चिनियाँ पक्षका अनुसार तालको आकार उल्लेखनीय भए पनि हाल यसको अवस्था नियन्त्रणभित्र रहेको छ । एन्नेङ ग्रुपले गरेको अनुगमनबाट तत्कालका लागि तालबाट असामान्य जोखिम देखिएको छैन भन्ने निष्कर्ष निकालिएको सीजीटीएनको रिपोर्टमा उल्लेख छ ।
यसै क्रममा, प्रभावित क्षेत्रभन्दा करिब पाँच किलोमिटर माथिल्लो तटीय भूभागमा अर्को बाँध ताल पनि पहिचान गरिएको छ । यसलाई दोस्रो बाँध ताल–२ का रूपमा उल्लेख गरिएको छ । दोस्रो तालको अवस्थाबारे समेत प्राविधिक अध्ययन र जोखिम मूल्याङ्कन जारी रहेको बताइएको छ ।
भदौ १० गते आएको भीषण बाढीपछि सीमाक्षेत्रको भूगोल, नदीको बहाव, पहिरोको सक्रियता तथा सम्भावित थप जोखिममाथि चिनियाँ पक्षले निरन्तर निगरानी गरिरहेको छ । बाढी र पहिरोबाट प्रभावित क्षेत्रमा नयाँ अवरोध सिर्जना हुन सक्ने सम्भावनालाई ध्यानमा राख्दै प्राविधिक टोलीले नियमित अनुगमन गरिरहेको जनाइएको छ ।
पहिरोबाट बनेका यस्ता तालहरूमा पानीको सतह, बाँधको स्थिरता र नदीको बहावमा आउने परिवर्तनले तल्लो तटीय क्षेत्रमा असर पार्न सक्ने भएकाले दुवै सीमावर्ती क्षेत्रमा सतर्कता आवश्यक मानिन्छ । हालसम्म सार्वजनिक विवरणअनुसार पहिलो तालको क्षेत्रफल करिब एक लाख वर्गमिटर रहेको र त्यसलाई १४ वटा मानक फुटबल मैदानसँग तुलना गरिएको छ ।
© 2026 All right reserved to sindhulisaugat.com
Design & Developed By
