सोमवार , भाद्र ८, २०८३
उदयपुर,०८ भदौ – उदयपुरको कटारी नगरपालिका–४ स्थित मरुवा खोलाबाट प्रहरीले ठूलो परिमाणमा गाँजा बरामद गर्दै टिपर र त्यसका चालकलाई नियन्त्रणमा लिएको छ । विशेष सूचनाका आधारमा जिल्ला प्रहरी कार्यालय उदयपुरबाट परिचालित प्रहरी टोलीले ना.७ ख ८१७३ नम्बरको टिपर चेकजाँच गर्ने क्रममा लुकाइछिपाइ ल्याइएको गाँजा फेला पारेको जिल्ला प्रहरी कार्यालय उदयपुरले जनाएको छ ।
प्रहरीका अनुसार टिपरभित्र नौवटा बोरामा लुकाएर राखिएको अवस्थामा कुल १९९ दशमलव ३२ किलोग्राम गाँजा बरामद गरिएको थियो । नियमित निगरानी तथा विशेष सूचनाका आधारमा गरिएको जाँचका क्रममा उक्त अवैध पदार्थ फेला परेको प्रहरीले जनाएको छ ।
गाँजा ओसारपसारमा संलग्न रहेको आशंकामा टिपर चालक सोम मगरलाई प्रहरीले नियन्त्रणमा लिएको छ । बरामद गाँजा, टिपर र पक्राउ परेका चालकलाई आवश्यक कानुनी प्रक्रियाका लागि प्रहरीको जिम्मामा राखिएको छ ।
घटनाबारे थप अनुसन्धान भइरहेको जिल्ला प्रहरी कार्यालयले जनाएको छ । गाँजा कहाँबाट ल्याइएको थियो, यसको गन्तव्य कहाँ थियो तथा कारोबारमा अन्य व्यक्तिहरूको संलग्नता छ कि छैन भन्ने विषयमा प्रहरीले अनुसन्धान अघि बढाएको छ । अनुसन्धानबाट प्राप्त तथ्यका आधारमा सम्बन्धित व्यक्तिमाथि प्रचलित कानुनअनुसार कारबाही प्रक्रिया अघि बढाइने प्रहरीले स्पष्ट पारेको छ ।
© 2026 All right reserved to sindhulisaugat.com
Design & Developed By
