काठमाडौं, चैत २७ — प्रधानमन्त्री बालेन शाहले मन्त्रिपरिषद् विस्तारको प्रक्रिया अघि बढाउँदै उद्योग तथा श्रम मन्त्रालयमा नयाँ नेतृत्व ल्याउने तयारी गरेका छन् । राष्ट्रिय स्वतन्त्र पार्टी (रास्वपा) को तर्फबाट सांसद गौरीकुमारी यादवलाई उद्योग मन्त्री र रामजी यादवलाई श्रम मन्त्रीमा नियुक्तिका लागि सिफारिस गरिएको छ ।

प्रधानमन्त्रीको सचिवालय स्रोतका अनुसार दुवै सांसदको नाम राष्ट्रपतिसमक्ष औपचारिक रूपमा पेश भइसकेको छ । संवैधानिक प्रक्रियाअनुसार राष्ट्रपतिबाट स्वीकृति प्राप्त भएपछि सम्भवतः आजै उनीहरूको नियुक्ति तथा पद तथा गोपनीयताको शपथ ग्रहण कार्यक्रम सम्पन्न हुने अपेक्षा गरिएको छ ।

गौरीकुमारी यादव महोत्तरी निर्वाचन क्षेत्र नम्बर ४ बाट तथा रामजी यादव सप्तरी निर्वाचन क्षेत्र नम्बर २ बाट फागुन २१ मा सम्पन्न प्रतिनिधिसभा निर्वाचनमा निर्वाचित भएका हुन् । दुवै जनालाई पार्टीभित्र सक्रिय र प्रभावशाली नेतृत्वको रूपमा हेरिँदै आएको छ । उनीहरूको नियुक्तिले रास्वपाको सरकारमा उपस्थितिलाई थप सुदृढ बनाउने विश्वास गरिएको छ ।

प्रधानमन्त्री शाहले उद्योग मन्त्रालय हालसम्म आफैंसँग राख्दै आएका थिए । औद्योगिक नीतिमा प्रत्यक्ष संलग्नता राख्ने उद्देश्यले उनले उक्त मन्त्रालय आफ्नै जिम्मेवारीमा राखेको विश्लेषण गरिँदै आएको थियो । तर, पछिल्लो राजनीतिक समायोजन र सत्तासाझेदारीको सन्तुलन कायम गर्ने रणनीतिअनुसार अब उक्त जिम्मेवारी पार्टीलाई हस्तान्तरण गर्न लागिएको देखिन्छ ।

यता, श्रम मन्त्रालयमा समेत नेतृत्व परिवर्तन गरिएको छ । यसअघि श्रम मन्त्रीका रूपमा कार्यरत दीपककुमार साहलाई पदमुक्त गरिएको छ । उनलाई रास्वपा सभापति रवि लामिछानेको सिफारिसमा बिहीबार पदबाट हटाइएको हो । यस परिवर्तनलाई सरकारभित्रको शक्ति सन्तुलन मिलाउने र कार्यसम्पादनलाई प्रभावकारी बनाउने कदमका रूपमा व्याख्या गरिएको छ ।

नयाँ मन्त्रीहरूको नियुक्तिसँगै सरकारले औद्योगिक विकास, रोजगारी सृजनासहित श्रम व्यवस्थापनका क्षेत्रमा नयाँ ऊर्जा थप्ने अपेक्षा गरिएको छ । विशेषगरी वैदेशिक रोजगारी, श्रमिक अधिकार र आन्तरिक उद्योग प्रवद्र्धनजस्ता विषयमा ठोस नीतिगत पहल हुने विश्वास व्यक्त गरिएको छ ।

मन्त्रिपरिषद् विस्तारको यो कदमलाई वर्तमान सरकारको कार्यक्षमता अभिवृद्धि र राजनीतिक स्थायित्व सुदृढ गर्ने प्रयासका रूपमा हेरिएको छ ।