आइतवार , भाद्र ८, २०८२
काठमाडौँ, ८भदौ — देशभर मनसुन सक्रिय भइरहेका बेला बागमती र कर्णाली प्रदेशका पहाडी भू–भागका केही स्थानमा भारी वर्षाको सम्भावना रहेको मौसम पूर्वानुमान महाशाखाले जनाएको छ। हाल मनसुनको न्यून चापीय रेखा सरदर स्थानको आसपासमै रहेकाले वर्षाको प्रभाव अझै केही दिन जारी रहने देखिएको महाशाखाले जनाएको हो। बङ्गालको खाडीबाट निरन्तर जलवाष्पयुक्त हावा प्रवेश गरिरहेको हुँदा वर्षाको गतिविधि थप तीव्र हुने आकलन गरिएको छ।
आज आइतबार दिउँसो देशभर साधारणतया बदली रहनेछ भने बागमती, गण्डकी, कर्णाली र सुदूरपश्चिम प्रदेशका पहाडी भू–भागका धेरै स्थानमा वर्षा हुने पूर्वानुमान छ। यस्तै, अन्य प्रदेशका तराई भूभागमा समेत कतिपय ठाउँमा मध्यम वर्षा हुने सम्भावना रहेको छ। विशेषगरी बागमती र कर्णाली प्रदेशका पहाडी भू–भागका एक–दुई स्थानमा भारी वर्षा भई बाढी–पहिरोको जोखिम समेत बढ्न सक्ने चेतावनी महाशाखाले दिएको छ। मधेश, कोशी र लुम्बिनी प्रदेशका तराई भू–भागमा भने हुरीबतासको संभावना रहेको र यसले दैनिक जीवन र यातायातमा असर पुर्याउन सक्ने देखिएको छ।
आज राति पनि देशका धेरैजसो भागमा आकाश साधारणतया बदली रहने महाशाखाले जनाएको छ। मधेश र कोशी प्रदेशसँगै देशका पहाडी भू–भागमा वर्षा हुने सम्भावना रहेको र बाँकी भू–भागमा आंशिक बदली मात्र रहने पूर्वानुमान गरिएको छ। विशेष गरी कोशी, मधेश, बागमती र गण्डकी प्रदेशका पहाडी भू–भागका कतिपय स्थानमा मध्यम वर्षा हुने देखिएको छ। यस क्रममा गण्डकी प्रदेशका पहाडी भू–भागका केही स्थानमा समेत भारी वर्षा हुने सम्भावना रहेको महाशाखाले चेतावनी दिएको छ।
जल तथा मौसम विज्ञान विभागले सम्भावित जोखिमलाई मध्यनजर गर्दै पहाडी क्षेत्रमा बसोबास गर्ने स्थानीयवासीलाई सतर्क रहन अनुरोध गरेको छ। वर्षासँगै बाढी, पहिरो र सडक अवरुद्ध हुने अवस्था सिर्जना हुन सक्ने भएकाले यात्रा गर्दा विशेष सावधानी अपनाउनुपर्ने महाशाखाले सुझाव दिएको छ। पछिल्ला दिनमा निरन्तर वर्षासँगै केही स्थानमा पहिरो र खोलानालामा पानीको सतह बढिरहेको अवस्थामा आगामी २४ घण्टा अझ संवेदनशील हुने आकलन गरिएको छ। महाशाखाले आवश्यक सावधानी अपनाउन आग्रह गर्दै मौसमसम्बन्धी अद्यावधिक जानकारी नियमित रुपमा लिन पनि अनुरोध गरेको छ।
© 2026 All right reserved to sindhulisaugat.com
Design & Developed By
