बिहिवार , भाद्र ५, २०८२
काठमाडौँ,५ भदौ – नेपालमा सक्रिय मनसुन केही कमजोर देखिएको मौसम पूर्वानुमान महाशाखाले जनाएको छ । मनसुनको न्यून चापीय रेखा सरदर स्थानभन्दा दक्षिणतर्फ सरकेकाले हाल देशका अधिकांश भागमा वर्षा न्यून मात्रामा देखिएको हो । तर, आगामी २४ घण्टाभित्र पहाडी भू–भागमा भारी वर्षा पर्न सक्ने चेतावनी महाशाखाले जारी गरेको छ ।
महाशाखाका अनुसार हाल कोशी, बागमती, गण्डकी, लुम्बिनी, कर्णाली र सुदूरपश्चिम प्रदेशका धेरैजसो पहाडी क्षेत्रमा आंशिकदेखि साधारण बदली छ । तराईका अधिकांश भू–भागमा भने मौसम सफा देखि आंशिक बदली मात्र रहेको छ । बागमती प्रदेशका पहाडी जिल्लाका केही स्थानमा अहिले मध्यम वर्षा भइरहेको र कोशी, गण्डकी तथा लुम्बिनीका थोरै भागमा हल्का पानी परेको महाशाखाले जनाएको छ ।
आज दिउँसो देशभर आंशिकदेखि साधारण बदली रहनेछ । हिमाली तथा पहाडी क्षेत्रका थोरै स्थानमा र तराई भू–भागका एक–दुई स्थानमा मध्यम वर्षा हुने सम्भावना रहेको महाशाखाको पूर्वानुमान छ । बागमती प्रदेशका उच्च पहाडी भू–भागमा भने एक–दुई स्थानमा भारी वर्षा पर्न सक्ने सम्भावना उच्च रहेको उल्लेख छ ।
महाशाखाका विज्ञका अनुसार कोशी, बागमती र गण्डकी प्रदेशका पहाडी क्षेत्रमा आगामी २४ घण्टासम्म तीव्र वर्षा पर्न सक्ने प्राविधिक अनुमान छ । यी क्षेत्रमा भारी वर्षासँगै पहिरो, बाढी तथा जमिन चिप्लिने जोखिम बढ्ने भएकाले सर्वसाधारणले सतर्कता अपनाउनुपर्ने महाशाखाले आग्रह गरेको छ ।
“मौसम अनिश्चित र चञ्चल हुने भएकाले वर्षा बढ्ने सम्भावना रहेका स्थानका बासिन्दाले सतर्क रहनुपर्छ,” महाशाखाले भनेको छ । साथै, स्थानीय निकाय, विपद् व्यवस्थापनसँग सम्बन्धित निकाय र सरोकारवाला पक्षलाई सतर्क रहन विशेष अनुरोध गरिएको छ ।
नेपालमा मनसुन कमजोर भए पनि छिटपुट वर्षा भइरहेकै छ । विशेषगरी पहाडी क्षेत्रमा मध्यमदेखि भारी वर्षा हुने देखिएकाले यात्रु तथा स्थानीय बासिन्दाले पछिल्लो मौसमी सूचनामा ध्यान दिनु आवश्यक रहेको मौसम विज्ञहरूको भनाइ छ ।
© 2026 All right reserved to sindhulisaugat.com
Design & Developed By
