दिल्ली,४ भदौ – दिल्लीकी मुख्यमन्त्री रेखा गुप्तामाथि बुधबार बिहान उहाँकै सरकारी निवासमा भएको आक्रमणले राजनीतिक वृत्त र जनमानसमा तरंग पैदा गरेको छ । साप्ताहिक ‘जनसुनुवाइ’ कार्यक्रम चलिरहेका बेला एक अपरिचित व्यक्तिले मुख्यमन्त्रीमाथि हातपातको प्रयास गरेपछि घटनाले सनसनी मच्चाएको हो । यस घटनाले मुख्यमन्त्रीको सुरक्षा व्यवस्थामाथि गम्भीर प्रश्न उठाएको छ ।

बुधबार बिहान नियमित तालिका अनुसार, मुख्यमन्त्री गुप्ताले आफ्नो निवासमा सर्वसाधरणका गुनासो सुन्दै हुनुहुन्थ्यो । सोही क्रममा एक व्यक्ति अचानक नजिक पुगेर उहाँलाई कपालमा समाती तानेर थप्पड हानेको भारतीय सञ्चारमाध्यमहरूले जनाएका छन् । यसरी अचानक भएको आक्रमणले त्यहाँ उपस्थित सुरक्षाकर्मी र अधिकारीहरूबीच भागादौड र हल्लीखल्ली मच्चिएको थियो ।

हातपातको प्रयास र धकेलाधकेलका कारण मुख्यमन्त्री गुप्ता लड्नुभएको थियो । उहाँको टाउकोमा सामान्य चोट लागेको बताइएको छ । घटनालगत्तै उहाँलाई चिकित्सकीय जाँचका लागि अस्पताल लगिएको थियो, जहाँ उहाँको स्वास्थ्य अवस्था सामान्य रहेको पुष्टि भएको छ ।

मुख्यमन्त्रीमाथि आक्रमण गर्ने व्यक्तिलाई सुरक्षाकर्मीले तत्कालै पक्राउ गरी प्रहरीलाई बुझाएका थिए । पक्राउ पर्ने व्यक्ति राजकोट, गुजरातका ४१ वर्षीय राजेश भाइ रहेको पुष्टि भएको छ । यद्यपि, प्रहरीले उनको आक्रमणको उद्देश्यबारे थप अनुसन्धान गरिरहेको छ । मुख्यमन्त्री कार्यालयका कर्मचारीहरूका अनुसार, ती व्यक्तिले पहिला एउटा पत्र दिएका थिए र त्यसपछि अचानक अपशब्द बोल्दै हातपात गरेका थिए ।

यस घटनापछि दिल्लीको राजनीति तातिएको छ । भारतीय जनता पार्टी (भाजपा) का दिल्ली अध्यक्ष विरेन्द्र सचदेवाका अनुसार, मुख्यमन्त्रीमाथि थप्पड प्रहार भएको भन्ने कुरा सत्य होइन, तर ठेलमठेलका क्रममा उहाँ लड्नुभएको हो । उहाँले मुख्यमन्त्रीको सुरक्षा व्यवस्था कमजोर भएकोमा जोड दिँदै यस घटनाको पूर्ण छानबिनको माग गर्नुभएको छ । सचदेवाका अनुसार, मुख्यमन्त्रीको आवासमा यस्तो घटना हुनुले सुरक्षा प्रोटोकलमा ठूलो लापरबाही भएको देखाउँछ ।

घटनापछि विभिन्न राजनीतिक दलका नेताहरूले यस घटनाको निन्दा गरेका छन् र मुख्यमन्त्रीको सुरक्षा सुनिश्चित गर्न माग गरेका छन् । यस घटनाले देशका उच्च पदस्थ व्यक्तिहरूको सुरक्षामाथि पुनरावलोकन गर्न आवश्यक रहेको बहसलाई पनि अगाडि ल्याएको छ ।

यस घटनाले मुख्यमन्त्रीको सरकारी निवासभित्रको सुरक्षा प्रणालीमाथि गम्भीर प्रश्नचिन्ह खडा गरेको छ । कसरी एक व्यक्ति मुख्यमन्त्रीको यति नजिक पुग्न सफल भए भन्नेबारे सुरक्षा निकायले जवाफ दिनुपर्ने माग उठेको छ । यस्तो संवेदनशील स्थानमा पनि सुरक्षाको मापदण्ड किन कमजोर भयो भन्ने विषयमा अनुसन्धान हुनुपर्ने राजनीतिक विश्लेषकहरूको भनाइ छ ।

दिल्ली प्रहरीले यस घटनालाई गम्भीरतापूर्वक लिँदै अनुसन्धान अगाडि बढाएको छ । मुख्यमन्त्रीको सरकारी निवासमा भएको यो आक्रमणले सार्वजनिक रूपमा सुरक्षा चुनौतीको नयाँ आयामलाई उजागर गरेको छ । भविष्यमा यस्ता घटना दोहोरिन नदिन के कस्ता कदम चालिनुपर्छ भन्ने विषयमा पनि व्यापक छलफल भइरहेको छ ।