शुक्रवार , चैत्र १०, २०७९
सिन्धुली– नेपालकै नमुना र सुन्दर सडकको रुपमा रहेको बीपी राजमार्गलाई फोहोर रहित बनाउने उद्देश्यले बृहत सरसफाई अभियान सुरु गरिएको छ । प्रत्येक साताको शुक्रबार सरसफाई गरी राजमार्गलाई सफा र सुन्दर बनाउने लक्ष राखिएको छ ।
पहिलो चरणमा कमलामाई नगरपालिका ६ को शिवनगरदेखि शिखरटोल, शान्तिनगर, रातमाटा, राम्माडी, ढुंग्रेवास, टारी हुँदै हिरापानीसम्मको सडकमा रहेको फोहोर हटाइएको छ ।
कमलामाई नगरपालिका, वन डिभिजन र जिल्ला प्रहरी कार्यालयको आयोजनामा भएको सरसफाई कार्यक्रममा राजमार्ग आवतजावत गर्ने भाडा तथा निजी सवारी साधनलाई रोकेर प्लास्टिकजन्य सामग्री र अन्य फोहोर जथाभावी नफ्याँक्न आग्रह गरिएको थियो । मित्रराष्ट्र जापान सरकारले अनुदान सहयोगमा निर्माण गरिदिएको राजमार्गलाई जथाभावी फोहोर फ्याँकेर कुरुप बनाउने छुट कसैलाई नभएको कमलामाई नगरपालिकाका मेयर उपेन्द्र पोखरेलले बताउनुभयो ।
प्लास्टिकजन्य सामग्री सवारी साधनबाट फाल्दा राजमार्गको नाला तथा पाखाभित्ता भरिएको भन्दै कमलामाई नगरपालिका वातावरण शाखा प्रमुख सागरकुमार ढकालले त्यसलाई रोक्नुपर्ने बताउनुभयो । तीन निकाय मिलेर सरसफाई सुरु गरिए पनि यो दीर्घकालीन नहुने भन्दै यात्रु तथा आम मानिसमा फोहोर जथाभावी फाल्न हुन्ने भन्ने चेतना फैलाउनुपर्ने ढकालको भनाई छ ।
बीपी राजमार्ग पर्यटकीय मार्ग पनि भएकाले यसलाई सफा र सुन्दर राख्न चेतना जगाउँदै जानुपर्ने प्रहरी प्रमुख एसपी राजकुमार सिलवालको भनाइ छ ।
ट्राफिक प्रहरी मार्फत सवारी साधनमा फोहोर राख्ने टोकरी अनिवार्य गर्दै लगिएको छ । चियाबारी, पिपलभन्ज्याङ, ढुग्रेभन्ज्याङ, सेल्फिडाँडा, सोलाभन्ज्याङ खनियाँखर्कसम्म कमलामाइ नगरपालिकाले र अन्य नगर तथा गाउँपालिकाको राजमार्ग क्षेत्रमा समन्वय गरी सरसफाई अभियानलाई प्रभावकारी बनाइँदै लगिने एसपी सिलवालले बताउनुभयो ।
© 2026 All right reserved to sindhulisaugat.com
Design & Developed By
