शुक्रवार , कार्तिक २७, २०८३
चितवन,२७ कात्तिक– चितवनको भरतपुर महानगरपालिका–१६ स्थित फुर्तीचोकमा विद्युतीय (ईभी) कारको ठक्करबाट एक महिलाको मृत्यु भएको छ भने अन्य दुई जना पैदलयात्री घाइते भएको जिल्ला प्रहरी कार्यालय चितवनले जनाएको छ ।
शुक्रबार बिहान ९ बजे फुर्तीचोकबाट नवीनचोकतर्फ जाँदै गरेको बा.प्र.०१–०३४ च ९२२१ नम्बरको ईभी कारले पैदलयात्रीहरूलाई ठक्कर दिँदा भरतपुर महानगरपालिका–१५ निवासी ३० वर्षीया पार्वती भुजेलको मृत्यु भएको हो ।
दुर्घटनामा गम्भीर घाइते भएकी भुजेललाई तत्काल उपचारका लागि भरतपुर सरकारी अस्पताल पु¥याइएको थियो । अस्पतालमा उपचारका क्रममा चिकित्सकले बिहान ९ बजेर ५४ मिनेटमा उनलाई मृत घोषणा गरेका थिए ।
सोही दुर्घटनामा अन्य दुई जना पैदलयात्री सामान्य घाइते भएका छन् । उनीहरूको भरतपुरस्थित नयाँ मेडिकल कलेजमा उपचार भइरहेको छ ।
दुर्घटनापछि प्रहरीले कारसहित चालक भरतपुर महानगरपालिका–१६ फुर्तीचोक निवासी ३३ वर्षीय मनोज पौडेललाई नियन्त्रणमा लिएको छ ।
प्रहरीले दुर्घटनाको कारण तथा घटनासँग सम्बन्धित अन्य पक्षबारे थप अनुसन्धान भइरहेको जनाएको छ ।
© 2026 All right reserved to sindhulisaugat.com
Design & Developed By
