शनिवार , चैत्र १५, २०७६
एजेन्सी ,१५ चैत – कोरोना भाइरस (कोभिड१९) को त्रासका कारण विश्वका अधिकांश देशमा लकडाउनको अवस्था छ । पुरै विश्वलाई सताइरहेको कोरोनाको डर यतीसम्म फैलिएको छ कि कोही व्यक्तिले हाच्छिउँ गर्दा भागदौड मच्चिने अवस्था आएको छ ।
केही घरायसी सामान किन्न मलमा आएकी एक महिलाले हाच्छिउँ गर्दा मलमा भएको ३६ लाखको सामान बाहिर फालिएको छ । पछि ती महिलालाई गिरफ्तार पनि गरिएको छ ।
यो घटना अमेरिकाको पेन्सिलभेनियाको हो । त्यहाँको प्रहरीका अनुसार स्थानीय एक मलमा सामान किन्न गएकी एक महिलाले मलको एउटा क्षेत्रमा हाच्छिउँ गर्दा उक्त क्षेत्रमा रहेको ३५ हजार डलरबराबरको सामान बाहिर फलिएको हो ।
स्टोरमा पुग्नासाथ ती महिलाले हाच्छिउँ गर्न थालेकी थिइन् । स्टोरकिपरका अनुसार मलका मालिकले उक्त सामान फाल्न लगाइ प्रहरी बोलाएका थिए । प्रहरीले ती महिलालाई पक्राउ गरेको छ ।
जाँचपश्चात महिलामा कोरोना संक्रमण नभएको पुष्टि भएको छ । उनले जानजान गल्ती नगरेको पनि पत्ता लागेको छ । ती महिलालाई आपराधिक कसुरमा मुद्दा चलाइएको प्रहरीले जनाएको छ । अमेरिकामा अहिले चीनमा भन्दा धेरै कोरोना संक्रमित फेला परेका छन् ।
© 2026 All right reserved to sindhulisaugat.com
Design & Developed By
