बिहिवार , आश्विन २२, २०८३
काठमाडौं, २२ असोज – नेपाली काँग्रेसको १५औं महाधिवेशनअन्तर्गत नयाँ नेतृत्व चयनका लागि बिहीबार हुने भनिएको मतदान निर्वाचन सामग्री समयमै उपलब्ध हुन नसक्दा शुक्रबार बिहानसम्मका लागि स्थगित भएको छ ।
केन्द्रीय निर्वाचन समितिले बिहीबार बिहान १० बजेदेखि मतदान सुरु गर्ने कार्यतालिका तय गरेको थियो । तर निर्धारित समयमा मतदान प्रक्रिया अघि बढ्न नसकेपछि पटकपटक समय परिवर्तन गरिएको थियो । तीनपटक समय सारेर दिउँसो साढे २ बजेसम्म पुर्याइए पनि मतदान सुरु हुन सकेन ।
मतदानका लागि आवश्यक तयारी पूरा हुन नसकेपछि निर्वाचन समितिले बिहीबार थप समयतालिका सार्वजनिक गरेन । अन्ततः सोही दिन मतदान सञ्चालन गर्ने योजना स्थगित गर्दै शुक्रबार बिहानदेखि प्रक्रिया अघि बढाउने निर्णय गरिएको हो ।
केन्द्रीय निर्वाचन समितिका संयोजक वरिष्ठ अधिवक्ता प्रेमबहादुर खड्काका अनुसार नयाँ नेतृत्व चयनका लागि मतदान शुक्रबार बिहान ७ बजेदेखि सुरु हुनेछ ।
निर्वाचन समितिले मतदान स्थगित हुनुको मुख्य कारण निर्वाचन सामग्री छापाखानाबाट समयमै प्राप्त हुन नसक्नुलाई जनाएको छ । आवश्यक सामग्री उपलब्ध हुन ढिलाइ भएपछि पूर्वनिर्धारित कार्यतालिकाअनुसार मतदान सञ्चालन गर्न नसकिएको समितिको भनाइ छ ।
यससँगै काँग्रेसको १५औं महाधिवेशनअन्तर्गत नेतृत्व चयनको मतदान प्रक्रिया पूर्वनिर्धारित समयभन्दा एक दिन पछाडि धकेलिएको छ । संशोधित कार्यतालिकाअनुसार शुक्रबार बिहान ७ बजेदेखि मतदान सञ्चालन गर्ने तयारी छ ।
© 2026 All right reserved to sindhulisaugat.com
Design & Developed By
