सिन्धुली ,२७ असार– जल तथा मौसम विज्ञान विभागको मौसम पूर्वानुमान महाशाखाले आगामी तीन दिन सिन्धुली भारीसम्म वर्षा हुने चेतावनी जारी गर्दै उच्च सतर्कता अपनाउन अनुरोध गरेको छ । मनसुन न्यूनचापीय प्रणाली सरदर स्थानबाट नेपालतर्फ सरेकाले महाशाखाले आज विशेष बुलेटिन जारी गर्दै उच्च सतर्कता अपनाउन भनेको हो ।

महाशाखाका मौसमविद गोविन्द झाका अनुसार हाल मनसुन न्यून चापीय रेखा पश्चिममा सरदर स्थानको आसपास र पूर्वमा सरदर स्थानभन्दा पूर्वतर्फ अर्थात् नेपालको दक्षिण सिमाना आसपास छ । उक्त रेखा बुधवार रातिबाट अझै नेपालतर्फ सर्ने सम्भावना छ । बिहीबारदेखि नेपाल आसपास क्षेत्रको उपल्लो वायुमण्डलमा पश्चिमी न्यून चापीय प्रणाली विकसित हुने सम्भावना देखिएको छ । त्यसैले यी दुवै प्रणालीको प्रभावले आज असार २६ गते रातिदेखि २९ गते बिहानसम्म नेपालमा मनसुन सक्रिय हुने पूर्वानुमान गरिएको मौसमविद झाले जानकारी दिनुभयो ।

सिन्धुली जिल्ला स्थित तिन ठुला नदीहरुमा आएको बाढीले सतर्कताको तह पार गरेकोको छ । बुधबार जिल्ला स्थित सुनकोशी, कमला, बागमती नदी र चँदाह खोलामा आएको बाढीले सतर्कता तह पार गरी खतरा तहमा पुगेको जल तथा मौषम विज्ञान विभागले जनाएको छ ।

लगातार परेको पानीसंगै नदीहरुमा आएको बाढीले खतराको तह पार गर्ने अवस्थामा पुगेकोले नदि तटिय क्षेत्र लगायत डुवान हुने क्षेत्रमा उच्च खर्तकता अपनाउन भनिएको छ । विभागका जलविद् भिमलाल पाण्डेका अनुसार कमलानदीमा ३ दशमलव ५ मिटरसम्मको बाढीलाई खतराको तह मान्ने गरिन्छ ।

कमला नदीमा आएको बाढीका कारण सिन्धुलीको कमलानदी तटिय क्षेत्र दुधौलीको, मैनी, बेल्सोत, नीपाने, हत्पते, टाँडी, हर्षाही, सिर्थौली लगायतका क्षेत्र जोखिममा परेका छन् । यि क्षेत्रमा डुवान हुन सक्ने भन्दै सतर्कता अपनाउन अनुरोध गरिएको छ ।

जल तथा मौषम विज्ञान विभागका अनुसार सुनकोसी नदीमा समेत पानिको सतह बढेका कारण सुनकोसी गढतिर क्षेत्रका बासिन्दालाई सतर्कता अपनाउन भनिएको छ ।

यस्तै बागमती नदिमा भने बाढीको जोखिम कायमै रहेको बताइएको छ । सिन्धुलीमा लगातार वर्षात हुँदा कमला, बागमती र सुनकोशी नदिका साथै मरिण, रोसी र चँदाहा खोलाको बाढीको कारण नदी तटीय क्षेत्रका बस्तिहरु जोखिममा पर्ने गरेका छन । यस्ता क्षेत्रमा हुने सम्भावित विपद्लाई ध्यानमा राखेर उच्च सतर्कता अपनाउन सिन्धुलीका प्रमुख जिल्ला अधिकारी भरत खनालले अनुरोध गरेका छन् ।

जिल्लाको सुनकोशी, मरिण, बागमती, कमला, चँदाहा जस्ता नदी आसपास तथा डुवान हुने होचा भुभागमा बसोबसा गर्ने नागरिकहरुले उच्च जोखिममा छन् । त्यस्ता क्षेत्रमा सतर्कता अपनाउन र सुरक्षा तथा उद्धारका लागि सुरक्षाकर्मीहरुलाई समेत हाइअलर्ट अवस्थामा बस्न भनिएको छ ।