सिन्धुली – सिन्धुलीमा आयुर्वेदिक उपचारप्रति आकर्षण बढ्दै गएको छ । आयुर्वेद तथा बैकल्पिक चिकित्सालय सिन्धुलीको तथ्यांक अनुसार चालु आर्थिक वर्षको १० महिनाको अवधिमा साढे १६ हजार बढीले आयुर्वेद सेवा लिएका छन् । २०८१ बैशाख सम्म १६ हजार ५ सय ६ जनाले सेवा लिएको कार्यालयले जानकारी दिएको छ । गत आर्थिक वर्ष ०७८/०७९ मा १२ हजार ९ सय ४५ जनाले आयुर्वेद सेवा लिएका थिए भने आर्थिक वर्ष २०७९/०८० मा १६ हजार ९ सय ५० जनाले सेवा लिएका थिए ।

यस वर्ष २० हजार बढी सेवाग्राहि पुर्‍याउने लक्ष्य रहेको आयुर्वेद तथा बैकल्पिक चिकित्सालय सिन्धुलीका सूचना अधिकारी दिपक तिमल्सिनाले जानकारी दिनुभयो । उहाँका अनुसार फिजियोथेरापिको दरबन्दी नभएकाले लक्ष्य प्राप्त गर्न नसकेको हो । “केहि महिना फिजियोथेरापिको दरबन्दी थिएन । त्यसै कारणले पनि सेवाग्राहिको संख्या कम भएको हो । दुइ देखि तीन महिना सम्म फिजियोथेरापि बन्द थियो, ” उहाँले भन्नुभयो ।

विगतभन्दा दिन प्रति दिन आयुर्वेदप्रति नागरिकको आकर्षण बढ्दै गएको उहाँले बताउनुभयो । उहाँले भन्नुहुन्छ, “अन्य उपचारभन्दा कम खर्चिलो र आयुर्वेदिक औषधिले अन्य भन्दा स्वास्थ्यमा कम असर गर्ने विश्वाससँगै यसतर्फ आकर्षण बढ्दै गएको हो ।” विशेषगरी ग्यास्ट्रिक, हाड जोर्नी तथा नसाको दुखाइ, पायल्स, रुघा, खोकी ज्वरो लगायतका स्वास्थ्य समस्या लिएर बिरामी आउने गरेको उहाँले बताउनुभयो ।

आयुर्वेद तथा बैकल्पिक चिकित्सालय सिन्धुलीले बहिरङ्ग सेवा, निःशुल्क औषधी, पञ्चकर्म र पूर्वकर्म, निशूल्क फिजियोथेरापी सेवा, निशुल्क योग सेवा, निशुल्क स्वास्थ्य जीवन प्रर्वधन कार्यक्रम, श–शुल्क फार्मेसी, निशुल्क स्तनपायी आमालाई मातृशिशु सुरक्षार्थ दुग्धवद्र्वक आयुर्वेद औषधी वितरण तथा प्रर्वधन कार्यक्रम, ज्येष्ठ नागरिक कार्यक्रम, अकुपञ्चर सेवा, ल्याब सेवा, भिडियो एक्सरे सेवा, जलौका अवचरण सेवा, अग्निकर्म सेवा, वस्तिकर्म सेवा, क्षारसुत्र एवम् minor ot सेवा, निशुल्क मुख्यमन्त्री जनता स्वास्थ्य कार्यक्रम हरेक बुधबार, निशुल्क स्वर्णविन्दु प्राशन कार्यक्रम हरेक महिनाको पुष्य नक्षत्रमा, निशुल्क पथ्य आहार कार्यक्रम र निशुल्क जानसन्धीगत वात पुनस्थापना कार्यक्रम स्वास्थ्य प्रवर्धन कार्यक्रम लगायतको सेवा प्रदान गरिएको उहाँले बताउनुभयो ।

आयुर्वेदिक उपचार पद्धति यहाँका स्थानीयको रोजाइमा पर्न थालेको छ । कम खर्चमा रोग निको हुने भएपछि स्थानीय यस्तो उपचार पद्धतिमा आकर्षित भएका हुन् । आयुर्वेदिक औषधिले अन्य औषधिभन्दा स्वास्थ्यमा कम असर पर्ने विषयमा जानकारी पाएसँगै स्थानीयमा विश्वास बढेको देखिन्छ । लामो समयसम्म ठूल्ठूला अस्पतालमा गएर एलोपेथिक विधिबाट उपचार गराउँदा रोग निको नभएको बताउँदै बिरामी उपचारका लागि आयुर्वेद तथा बैकल्पिक चिकित्सालय सिन्धुली पुग्ने गरेका छन् ।

आयुर्वेदिक औषधिले स्वास्थ्यमा सुधार आएपछि उपचार पद्धतिप्रति विश्वास बढेको स्थानीयवासी ज्ञानी मायाँ लामाले बताउनुभयो । “मेरो ग्याष्ट्रिकको समस्या छ । विभिन्न अस्पतालमा उपचार गराउन गएँ”, उहाँले भन्नुभयो, “त्यति गर्दा पनि निको नभएपछि अहिले करिब एक महिनाबाट नियमित रूपमा यहाँ आएर उपचार गराउँदै छु । अहिले सुधार भइरहेको छ । यहाँ उपचार गराउन थालेपछि मेरो रोग निको भइरहेको छ, ” उहाँले भन्नुभयो । यस्तै स्थानीय सन्तोष विकले पनि बाहिरका ठूला अस्पतालमा गएर उपचार गराउँदा निको नभएको रोग आयुवेर्दिक उपचारबाट निको भएको अनुभव सुनाउनुभयो । उहाँले भन्नुभयो,“खासमा हामीले यो उपचार पद्धतिबारे जानकारी नपाउँदा समस्यामा परेका रहेछौं । मेरो निकै लामो समयबाट ढाडमा समस्या थियो । उपचार गराउन विभिन्न शहरका ठूला अस्पतालमा गएँ तर अहिले यहाँ उपचार गराउन थालेपछि निको हुँदै गएको छ ।” बाथरोग, हार्डजोनी, अम्लपित्त, पायल्स लगायत रोगको प्रभावकारी विधिबाट उपचार हुने भएकाले सेवाग्राही बढेका छन् । नागरिकहरुले आयुर्वेदिक औषधिको महत्वबारे जानकारी हुन थालेपछि आयुर्वेदिक औषधि प्रयोग गर्ने गरेका छन् ।