सिन्धुली– प्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ आगामी माघ २० गते सिन्धुली आउनुहुने भएको छ । जिल्लाको दुधौली नगरपालिका वडा नम्बर ५ स्थित सिर्थौलीमा निर्माण भएको नगर अस्पतालको भवन उद्घाटनकालागि प्रधानमन्त्री दाहाल सिन्धुली आउन लाग्नुभएको हो ।

संघीय सरकारको भ्याटबाहेक करिब १६ करोड रुपैँयाको लागतमा दुई तलाको अस्पताल भवन निर्माण गरिएको दुधौली नगरपालिकाको प्रमुख दिनेश अधिकारीले बताउनुभयो । उक्त अस्पतालको २०७७ मंसिर १५ गते शिलान्यास भई निर्माण सुरु गरिएको थियो । करिब एक बिघा जग्गामा १५ शय्याको अस्पताल निर्मण भएको मेयर अधिकारीले बताउनुभयो । आगामी दिमा १५ शय्या बेडको अस्पताललाई विस्तार गरि २५ शय्या बनाउने योजना रहेका नगरपालिकाले जनाएको छ । नगरपालिकाका अनुसार सिर्थौलीमा रहेको प्राथमिक स्वास्थ्य केन्द्रलाई विस्तार गरी नगर अस्पताल बनाइएको हो ।

दुधौली नगरपालिाकको उप–प्रमुख थारुका अनुसार अस्पताल निर्माणसँगै स्थानीयमा उत्साह छाएको छ । उहाँले भन्नुभयो, ‘अस्पताल बनेको ठाउँमा पहिलो प्राथमिक स्वास्थ्य केन्द्र रहेको र सुत्केरी, गर्भ जाँच, नियमित खोप, ल्याब, सर्पदंश उपचार, स्वास्थ्य बिमा लगायतका सेवाहरु सञ्चालन भइरहेको छ ।’ जिल्लाका अन्य स्थानीय तहले पनि धमाधम १५ शय्याको अस्पताल धमाधम बनाउँदै छन् । नौँ वटा स्थानीय तहमध्ये जिल्ला सदरमुकाम समेत रहेको कमलामाई नगरपालिकाको सिन्धुलीमाढीमा सबैभन्दा ठुलो सुविधासम्पन्न सिन्धुली अस्पताल छ । हाल ५० शय्या रहेको उक्त अस्पताललाई क्षमता विस्तार गरी एक सय शय्या बनाउन लागिएको अस्पताल विकास समितिका अध्यक्ष सतीशचन्द्र ढकालले जानकारी दिनुभयो । बाँकी अन्य आठ वटा स्थानीय तहले पनि नागरिकलाई स्थानीयस्तरमा नै आधारभूत स्वास्थ्य सेवाको सुविधा दिन धमाधम १५ शय्याको अस्पताल निर्माण गरेको सम्बन्धित स्थानीय तहले जनाएका छन् । सबैभन्दा पछि मरिण गाउँपालिकाले गत साउनदेखि उक्त अस्पताल बनाउन सुरु गरेको हो ।

मरिण गाउँपालिका–७ महेश्वतामा १५ शय्याको अस्पताल भवन निर्माणका लागि शिलान्यास भएर धमाधम निर्माण भइरहेको गाउँपालिका अध्यक्ष विमर्श मुक्तान ‘प्रख्यात’ ले जानकारी दिनुभयो । जग्गा विवादका कारण दुई वर्षदेखि १५ शय्याको आधारभूत अस्पताल भवन निर्माणको काम रोकिएको सुनकोशी गाउँपालिकामा अहिले निर्माण प्रक्रिया अगाडि बढेको गाउँपालिकाले जनाएको छ । गोलञ्जोर गाउँपालिकामा पनि उक्त अस्पताल निर्माणका लागि नक्सा (डिजाइन) पूरा भई टेण्डर प्रक्रियामा छ । फिक्कल गाउँपालिका–३ चनौटेमा दुई वर्षदेखि १० शय्याको अस्पताल भवन निर्माणाधीन अवस्थामा छ । भवन निर्माणको काम अन्तिम चरणमा पुगेको गाउँपालिकाले जनाएको छ । हरिहरपुरगढी गाउँपालिका–२ रतनपुरमा पनि १५ शय्याको आधारभूत अस्पताल निर्माणाधीन छ । घ्याङलेख गाउँपालिका–३ सोलाभञ्याङमा डिपिआर भएको वर्ष दिन बितिसक्दा पनि अस्पताल भवन निर्माणको काम अगाडि बढ्न सकेको छैन । जग्गा विवादका कारण रोकिएको निर्माणकार्य चाँडै सुल्झाएर अगाडि बढाइने पालिकाले जनाएको छ ।

जिल्लाको तीनपाटन गाउँपालिकाले चकमके बजारमा पनि संघीय सरकारको १७ करोड ९१ लाख रुपियाँको लागतमा दुई वर्षदेखि १५ शय्याको आधारभूत अस्पताल निर्माण गरिरहेको छ । गाउँमा रहेको प्रथामिक स्वास्थ्य केन्द्रलाई अस्पतालमा परिणत गरी भवन बनाउन सुरु गरिएको र अब एक वर्षभित्र सक्ने योजना रहेको गाउँपालिकाले जनाएको छ ।