बिहिवार , भाद्र ३०, २०७९
सिन्धुली – नेपाल खानेपानी संस्थानको पदपूर्ति समितिबाट हटाइनु भएकी निरु दर्लामीले खानेपानीमन्त्री उमाकान्त चौधरीमाथि गम्भीर आरोप लगाउनु भएको छ । संस्थानमा मन्त्रीका मान्छे भर्ती गर्न लाखौं रुपैयाँको चलखेल गरिएको तथा आफूलाई अपमानपूर्वक हटाइएको उहाँको भनाई छ ।
बुधवार एक विज्ञप्ति जारी गर्दै दर्लामीले संस्थानभित्र भइरहेको राजनीतिक हस्तक्षेप सार्वजनिक गर्नु भएको हो । मंगलवार बसेको संस्थानको बोर्ड बैठकले पदपूर्ति समितिबाट उहाँलाई हटाएर खानेपानी मन्त्रालयका सहसचिव तिरेशप्रसाद खत्रीलाई नियुक्त गरेको थियो ।
यस विषयमा दलार्ममीले भन्नु भयो, “हाल निर्वाचनको मिति घोषणा भइसकेको अवस्थामा रातारात लाखौं रुपैयाँको चलखेल गरी बहुमतको हवाला दिँदै मलाई पदपूर्ति समितिको अध्यक्षबाट अपमानपूर्वक ढंगले जबरजस्ती हटाइ मन्त्रालयमा कार्यरत कर्मचारी सहसचिव श्री तिरेशप्रसाद खत्रीलाई पदपूर्ति समितिको अध्यक्ष बनाएर निज चौधरीको आफन्त र आसेपासे भर्ना गर्न खोजिएको छ । यो कार्यको जति खेद र भत्सर्ना गरे पनि कम हुन्छ ।”
दर्लामीका अनुसार संस्थानले गत चैत १ गते ४६ जना कर्मचारीको पदपूर्ति गर्ने उद्देश्यले १ देखि ३ तहसम्मको विज्ञापन खुलाएको थियो । त्यसमा एक हजार १५८ जनाले मौखिक परीक्षा दिएका थिए । अन्तिम नतिजा प्रकाशनमा मन्त्रीका मान्छे पार्न अध्यक्ष गुणाखर भुसाल सबैभन्दा बढी लागिपरेको उहाँको आरोप छ । लाचार बोर्ड अध्यक्षलाई कारबाही गर्न उहाँले सबैको ध्यानाकर्षण गराउनु भएको छ ।
२०६४ सालमा माओवादीभित्रकै अनेक षडयन्त्रका बाबजुद सिन्धुलीबाट प्रत्यक्ष निर्वाचित हुनु भएको संविधानसभा सदस्य हुनु हुन्छ । उहाँले जनयुद्धमा एक छोरा र श्रीमान गुमाउनु भएको थियो । उहाँ सहिद शेरमान कुवरको जिवन संगिनू हुनु हुन्छ ।
© 2026 All right reserved to sindhulisaugat.com
Design & Developed By
